గత ఏడాది వచ్చిన ‘కోర్ట్’ సినిమాతో మంచి గుర్తింపు తెచ్చుకున్న హర్ష్ రోషన్, శ్రీదేవీ మరోసారి జంటగా నటిస్తున్న చిత్రం ‘బ్యాండ్ మేళం’. మ్యాంగో మాస్ మీడియా సమర్పణలో కోన ఫిల్మ్ కార్పొరేషన్ బ్యానర్పై కోన వెంకట్ నిర్మించిన ఈ చిత్రానికి సతీష్ జవ్వాజీ దర్శకత్వం వహించారు. కావ్య, శ్రావ్య నిర్మించిన ఈ సినిమా మార్చి 13న ప్రేక్షకుల ముందుకు రానుండగా, తాజాగా విడుదలైన టీజర్తో సినిమా పై ఆసక్తి మరింత పెరిగింది. టీజర్ లాంచ్ ఈవెంట్ను ఘనంగా నిర్వహించగా, శివాజీ మరియు స్టార్ మ్యూజిక్ డైరెక్టర్ తమన్ ముఖ్య అతిథులుగా హాజరయ్యారు.
ఈ సందర్భంగా నటుడు శివాజీ మాట్లాడుతూ సినిమా గురించి ఆసక్తికర వ్యాఖ్యలు చేశారు. ‘బ్యాండ్ మేళం’ ఒక మంచి లవ్ స్టోరీతో తెరకెక్కిందని, ఇందులో తనకు కూడా ఓ పాత్ర చేయమని అడిగారని తెలిపారు. అయితే అదే తరహా పాత్రలు రొటీన్ అవుతాయని భావించి ఆఫర్ను తిరస్కరించినట్లు చెప్పారు. హర్ష్ రోషన్ మంచి టాలెంట్ ఉన్న యంగ్ హీరో అని, భవిష్యత్తులో పెద్ద స్థాయికి ఎదుగుతాడని ఆయన అభిప్రాయపడ్డారు. అలాగే శ్రీదేవీ నటనను కూడా ప్రశంసిస్తూ, ఈ సినిమా టీమ్ అంతా మరో స్థాయికి చేరుకుంటారని నమ్మకం వ్యక్తం చేశారు.
సంగీత దర్శకుడు తమన్ మాట్లాడుతూ కోన వెంకట్ తన కెరీర్లో ఎంతో ముఖ్యమైన వ్యక్తి అని అన్నారు. ‘దూకుడు’ సినిమా తర్వాత తన ప్రయాణం ఇంకా బలపడిందని గుర్తుచేసుకున్నారు. కోన వెంకట్ చేతిలో గోల్డ్ ఉందని కాదు, ఆయన హ్యాండ్నే గోల్డెన్ హ్యాండ్ అని సరదాగా వ్యాఖ్యానించారు. హర్ష్ రోషన్, శ్రీదేవీని చూస్తుంటే ‘నువ్వే కావాలి’ రోజుల్ని గుర్తుకు తెస్తున్నారని, విజయ్ బుల్గానిన్ అందించిన సంగీతం కూడా ఈ సినిమాకు ప్రత్యేక బలం అవుతుందని చెప్పారు.
నిర్మాత కోన వెంకట్ మాట్లాడుతూ ప్రేమ కథలకు ప్రేక్షకులు ఎలాంటి ఆదరణ ఇస్తారో ‘నిన్ను కోరి’ ద్వారా తెలిసిందని, అదే ఫీలింగ్తో ‘బ్యాండ్ మేళం’ రూపొందించానని చెప్పారు. కథలోని సంఘర్షణ కొత్తగా ఉంటుందని, క్లైమాక్స్ ప్రేక్షకులను ఆకట్టుకుంటుందని అన్నారు. హర్ష్ రోషన్, శ్రీదేవీలలో ఉన్న యాక్టింగ్ టాలెంట్ కారణంగానే వారిని ఎంపిక చేసినట్లు వెల్లడించారు. ప్రముఖ నటుడు సాయి కుమార్ ఈ కథ విన్న తర్వాత ఆశ్చర్యపోయారని కూడా తెలిపారు.
దర్శకురాలు నందినీ రెడ్డి మాట్లాడుతూ టీజర్ చాలా నచ్చిందని, సినిమా రిలీజ్ రోజున దర్శకుడు మాట్లాడితేనే అసలు ఫలితం తెలుస్తుందని చెప్పారు. కోన వెంకట్తో తనకు ఉన్న అనుబంధాన్ని గుర్తుచేసుకుంటూ, కొత్త టాలెంట్ను ఇండస్ట్రీకి పరిచయం చేస్తూ ఉండాలని ఆశించారు. దర్శకుడు శివ నిర్వాణ కూడా కోన వెంకట్ను తనకు గాడ్ఫాదర్గా అభివర్ణిస్తూ, ఈ సినిమా పెద్ద హిట్ కావాలని కోరుకున్నారు.
దర్శకుడు వేణు ఊడుగుల మాట్లాడుతూ ‘బ్యాండ్ మేళం’ కమర్షియల్ లెక్కల కోసం తీసిన సినిమా కాదని, ప్రేమతో రూపొందించిన కథ అని అభిప్రాయపడ్డారు. తెలంగాణ మట్టి వాసనతో కూడిన ఈ సినిమా ప్రేక్షకులకు కొత్త అనుభూతి ఇస్తుందని చెప్పారు. టీజర్లోనే కథలోని ఇంటెన్స్ మరియు ఫిలాసఫికల్ టచ్ కనిపించిందని తెలిపారు.
యువ హీరో హర్ష్ రోషన్ మాట్లాడుతూ ఈ చిత్రం పక్కా తెలంగాణ బ్యాక్డ్రాప్ విలేజ్ లవ్ స్టోరీ అని, తన పాత్రలో అన్ని ఎమోషన్స్ పీక్లో ఉంటాయని చెప్పారు. యంగ్ బ్యూటీ శ్రీదేవీ కూడా ‘కోర్ట్’కు ఇచ్చిన ప్రేమను ‘బ్యాండ్ మేళం’కూ అందించాలని ప్రేక్షకులను కోరింది. దర్శకుడు సతీష్ జవ్వాజీ మాట్లాడుతూ ‘కోర్ట్’ తర్వాత మరో మంచి కథతో వస్తున్నందుకు సంతోషంగా ఉందని, సినిమా అందరికీ నచ్చుతుందని ఆశాభావం వ్యక్తం చేశారు.
మొత్తానికి ‘బ్యాండ్ మేళం’ టీజర్ లాంచ్ ఈవెంట్లో చేసిన కామెంట్స్ సినిమా పై ఉన్న అంచనాలను మరింత పెంచాయి. తెలంగాణ బ్యాక్డ్రాప్లో తెరకెక్కిన ఈ లవ్ స్టోరీ మార్చి 13న ప్రేక్షకుల ముందుకు రానుండగా, టీజర్కు వచ్చిన స్పందన చూస్తుంటే సినిమా మంచి విజయం సాధించే అవకాశాలు ఉన్నట్లు కనిపిస్తోంది.